រាជធានីភ្នំពេញ៖ ជឿជាក់ថា ប្រិយមិត្តជាច្រើន ប្រាកដជាបានជ្រាបរួចមកហើយ ជុំវិញករណីក្រុមគ្រួសារក្រីក្រមួយ ដែលមានជីវភាពលំបាករស់នៅក្នុងផ្ទះតូចទោល ធ្វើអំពីសំណប៉ាហាំងចាស់ៗ នៅពេលភ្លៀងម្តងៗជួបការលំបាកយ៉ាងខ្លាំង រហូតដល់ស្ត្រីជាម្ដាយបានចេញមុខថតវីដេអូអង្វរករទៅកាន់លោកស្រី ទ្រី ដាណា សុំឲ្យកុំភ្លេចពួកគាត់នៅពេលភ្លៀងមកដល់។ វីដេអូនេះបានធ្វើឲ្យមហាជនជាច្រើនមានការអាណិតអាសូរយ៉ាងខ្លាំង។
យ៉ាងណាមិញ ក្រោយពីវីដេអូនេះបានរីករាលដាល និងមានការចូលរួមអាណិតអាសូរពីមហាជនជាច្រើន ស្រាប់តែមុននេះបន្តិច លោកស្រី ទ្រី ដាណា ដែលជាអ្នកជំនួញល្បីឈ្មោះ និងជាមនុស្សដែលមានចិត្តបុណ្យទាន បានបង្ហោះសារមួយនៅលើបណ្ដាញសង្គមហ្វេសប៊ុករបស់ខ្លួន ដោយបានបញ្ជាក់ថា លោកស្រីបានដឹងពីមូលហេតុពិតប្រាកដហើយ។ មូលហេតុដែលក្រុមគ្រួសារខាងលើអង្វរករលោកស្រី “កុំឲ្យភ្លៀង” គឺដោយសារតែស្ថានភាពផ្ទះសម្បែងរបស់ពួកគេដែលទ្រុឌទ្រោមខ្លាំង នៅពេលមានភ្លៀងធ្លាក់ចុះ ធ្វើឲ្យពួកគាត់ជួបការលំបាកយ៉ាងខ្លាំង។
លោកស្រីបានបង្ហាញពីការយល់អំពីការលំបាករបស់ពួកគេ និងបានបញ្ជាក់យ៉ាងខ្លីថា “ជួបគ្នាឆាប់ៗអូន” ដែលជាសញ្ញាបង្ហាញថា លោកស្រីត្រៀមនឹងចុះទៅជួយផ្ទាល់ហើយ ដើម្បីដោះស្រាយបញ្ហាផ្ទះសម្បែងរបស់គ្រួសារនេះ។
ការបង្ហោះរបស់លោកស្រី ទ្រី ដាណា បានទទួលការចាប់អារម្មណ៍ និងសរសើរយ៉ាងផុសផុលពីមហាជន។ មនុស្សជាច្រើនបានចូលទៅខមមិន បង្ហាញការកោតសរសើរចំពោះទឹកចិត្តសប្បុរសធម៌របស់លោកស្រី ដែលតែងតែជួយដល់ជនក្រីក្រដោយមិនរើសអើង។ អ្នកខ្លះថែមទាំងបានហៅលោកស្រីថាជា “ទេវតា” ដែលបានចុះមកជួយដល់ក្រុមគ្រួសារដែលកំពុងជួបទុក្ខលំបាកនេះ ផ្ទុយពីការអង្វរករទេវតាដែលមិនដែលឃើញជួយឡើយ។
ទឹកចិត្តដ៏ល្អប្រពៃរបស់លោកស្រី ទ្រី ដាណា ពិតជាគំរូល្អមួយសម្រាប់សង្គមជាតិ ដែលបង្ហាញពីការចែករំលែក និងជួយគ្នាទៅវិញទៅមកក្នុងគ្រាមានអាសន្ន និងជាក្តីសង្ឃឹមសម្រាប់ក្រុមគ្រួសារដែលកំពុងជួបការលំបាកជាទីបំផុតមួយនេះ។
