វ៉ាស៊ីនតោន៖ ទីភ្នាក់ងារស្ទាបស្ទង់ភូមិសាស្ត្រសហរដ្ឋអាម៉េរិក (USGS) បានចេញផ្សាយការវាយតម្លៃដ៏គួរឲ្យព្រួយបារម្ភមួយកាលពីថ្ងៃសុក្រ ដោយព្យាករណ៍ថា ចំនួនអ្នកស្លាប់នៅក្នុងគ្រោះមហន្តរាយរញ្ជួយដីកម្រិត ៧.៧ រ៉ិចទ័រ នៅកណ្តាលប្រទេសមីយ៉ាន់ម៉ា អាចនឹងកើនឡើងដល់លើសពី ១០,០០០ នាក់។
ការប៉ាន់ប្រមាណនេះត្រូវបានធ្វើឡើងបន្ទាប់ពី USGS បានចេញសេចក្តីប្រកាសអាសន្ន “ពណ៌ក្រហម” ដែលជាកម្រិតប្រកាសអាសន្នខ្ពស់បំផុត ពាក់ព័ន្ធនឹងផលប៉ះពាល់នៃគ្រោះរញ្ជួយដីនេះ។ ការប្រកាសអាសន្ននេះ សំដៅលើលទ្ធភាពខ្ពស់នៃការបាត់បង់ជីវិតមនុស្ស និងការខូចខាតផ្នែកសេដ្ឋកិច្ចក្នុងទំហំធំធេង ដែលបង្កឡើងដោយគ្រោះរញ្ជួយដីដ៏ខ្លាំងក្លាកាលពីរសៀលថ្ងៃសុក្រ។
ទន្ទឹមនឹងការព្យាករណ៍របស់ USGS តួលេខជាក់ស្តែងដែលត្រូវបានរាយការណ៍មកទល់ពេលនេះ បានបញ្ជាក់ថា ចំនួនអ្នកស្លាប់បានកើនឡើងដល់ ៧០០ នាក់ហើយ។ យ៉ាងណាក៏ដោយ អាជ្ញាធរ និងក្រុមអ្នកសង្គ្រោះរំពឹងថា ចំនួននេះនឹងបន្តកើនឡើងបន្ថែមទៀត ដោយសារប្រតិបត្តិការស្វែងរក និងជួយសង្គ្រោះនៅតែបន្តធ្វើឡើងយ៉ាងសកម្មនៅតាមតំបន់រងគ្រោះជាច្រើន។
