ពុទ្ធោអើយ!! មន្ត្រីនគរបាលនារីម្នាក់ រងរបួសធ្ងន់ក្នុងគ្រោះថ្នាក់ចរាចរណ៍ ត្រូវបញ្ជូនទៅសង្គ្រោះនៅថៃ គ្រួសារអំពាវនាវរកជំនួយ
បាត់ដំបង៖ នារីម្នាក់ដែលជាមន្ត្រីនគរបាលជាតិនៃស្នងការដ្ឋាននគរបាលខេត្តបាត់ដំបង បានរងរបួសយ៉ាងធ្ងន់ធ្ងរនៅក្នុងឧបទ្ទវហេតុគ្រោះថ្នាក់ចរាចរណ៍មួយ កាលពីចុងខែមេសាកន្លងទៅ ហើយត្រូវបានក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យក្នុងប្រទេសថៃ ដោយសារស្ថានភាពធ្ងន់ធ្ងរ ខណៈក្រុមគ្រួសារកំពុងប្រឈមនឹងការខ្វះខាតថវិកាសម្រាប់ថ្លៃព្យាបាល និងបានអំពាវនាវរកជំនួយតាមបណ្ដាញសង្គម។
យោងតាមសេចក្តីជូនដំណឹងរបស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលខេត្តបាត់ដំបង ដែលបានចេញផ្សាយនៅថ្ងៃទី០១ ខែឧសភា ឆ្នាំ២០២៣ បានឲ្យដឹងថា កាលពីថ្ងៃទី២៨ ខែមេសា ឆ្នាំ២០២៣ កញ្ញាព្រិន្ទបាលឯក សារ រក្សា ជាមន្ត្រីនគរបាលជាតិនៃអធិការដ្ឋាននគរបាលស្រុកកំរៀង ចំណុះស្នងការដ្ឋាននគរបាលខេត្តបាត់ដំបង បានជួបឧបទ្ទវហេតុគ្រោះថ្នាក់ចរាចរណ៍ (ម៉ូតូបុកម៉ូតូ) នៅក្នុងភូមិសាស្ត្រ ឃុំត្រាង ស្រុកកំរៀង ខណៈពេលធ្វើដំណើរទៅធ្វើការ។ ហេតុការណ៍នេះបណ្តាលឲ្យកញ្ញា សារ រក្សា រងរបួសធ្ងន់ធ្ងរ។
ភ្លាមៗក្រោយកើតហេតុ កញ្ញាត្រូវបានបញ្ជូនទៅសង្គ្រោះនៅមណ្ឌលសុខភាពត្រាង បន្ទាប់មកបញ្ជូនបន្តទៅមន្ទីរពេទ្យបង្អែកស្រុកសំពៅលូន។ ប៉ុន្តែដោយសារស្ថានភាពរបួសធ្ងន់ធ្ងរ (បែកក្បាល និងរបួសជើងធ្ងន់ធ្ងរ មិនដឹងខ្លួន) ក្រុមគ្រួសារបានសម្រេចចិត្តបញ្ជូនកញ្ញាទៅព្យាបាលបន្តនៅមន្ទីរពេទ្យក្នុងប្រទេសថៃ។
ទន្ទឹមនឹងនេះ បណ្ដាញសង្គមហ្វេសប៊ុកជាច្រើន រួមទាំងគណនីឈ្មោះ “Nit Net” និង “Bong Ting” ដែលគេជឿថាជាបងប្អូន ឬសាច់ញាតិរបស់កញ្ញា បានបង្ហោះសារអំពាវនាវរកជំនួយសម្រាប់ការចំណាយលើថ្លៃព្យាបាល ដែលត្រូវបានរៀបរាប់ថាមានចំនួនច្រើនសន្ធឹកសន្ធាប់។ តាមការបង្ហោះនោះ ការវះកាត់ក្បាលបានជោគជ័យចំណាយអស់ ១ លានបាត ហើយត្រូវការវះកាត់ជើងជាបន្ទាន់នៅថ្ងៃទី០១ ខែឧសភា ដែលត្រូវចំណាយ ៥ សែនបាតបន្ថែមទៀត បើមិនដូច្នេះទេអាចនឹងត្រូវកាត់ជើងចោល។ ថ្លៃសម្រាកព្យាបាលប្រចាំថ្ងៃគឺ ១ សែនបាត។ ក្រុមគ្រួសារបានបញ្ជាក់ថា ពួកគេបានលក់រថយន្ត ដីធ្លី និងអល្ល័ង្កការមួយចំនួនហើយ ប៉ុន្តែនៅតែមិនគ្រប់គ្រាន់សម្រាប់ការចំណាយ។ គណនីឈ្មោះ “Yem Set” ដែលអះអាងថាជាឪពុកម្តាយក៏បានបញ្ជាក់ពីស្ថានភាពនេះដែរ។
ឆ្លើយតបនឹងករណីនេះ លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង បន្ទាប់ពីបានទទួលព័ត៌មាននេះនៅថ្ងៃទី០១ ខែឧសភា បានចាត់ឲ្យការិយាល័យផែនការងារ និងធនធានមនុស្ស នៃស្នងការដ្ឋាន ទំនាក់ទំនងជាមួយលោកអធិការនគរបាលស្រុកកំរៀង ដើម្បីចាត់ចែងនាំយកថវិកាមួយចំនួនទៅជូនក្រុមគ្រួសារជនរងគ្រោះ ដើម្បីសម្រួលដល់ការលំបាកជាជំហានដំបូង។
ស្នងការដ្ឋាននគរបាលខេត្តបាត់ដំបង ក៏បានកត់សម្គាល់ពីការផ្សព្វផ្សាយអំពាវនាវរកជំនួយតាមបណ្ដាញសង្គមដោយមានភ្ជាប់នូវលេខគណនីធនាគារ (QR Code) ផងដែរ។ ស្នងការដ្ឋានកំពុងឲ្យលោកអធិការនគរបាលស្រុកកំរៀង ពិនិត្យផ្ទៀងផ្ទាត់ជាមួយក្រុមគ្រួសាររបស់កញ្ញា សារ រក្សា ថាតើការអំពាវនាវនេះជាការពិត ឬយ៉ាងណា ដើម្បីធានាពីតម្លាភាព និងជៀសវាងការឆ្លៀតឱកាសផ្សេងៗ។
ស្នងការដ្ឋាននគរបាលខេត្តបាត់ដំបង សូមជូនដំណឹងដល់សាធារណជនមេត្តាជ្រាប និងសូមចូលរួមជូនពរដល់កញ្ញា សារ រក្សា ឆាប់បានជាសះស្បើយ៕
